हामी सबैकाे संसारन्यूज

१३ फागुन, काठमाडौं । नेपाल ट्रष्टका अध्यक्ष ईश्वर पोखरेलले एक श्वेतपत्र जारीगर्दै डा बाबुराम भट्टराई र विजय गच्छदारले ट्रष्टको जग्गा व्यक्तिलाई दिने निर्णय गरेको दाबी गरेका छन् । मंगलबार जारी गरेको श्वेतपत्रमा करिब ७ वर्षअघि तत्कालिन डा बाबुराम भट्टराई नेतृत्वको मन्त्रिपरिषदबाट १७२ रोपनी १५ आना जग्गा मोहीका नाममा कायम गरिएको जनाइएको छ । उक्त जग्गा नेपाल ट्रष्टकै नाममा फिर्ता ल्याउने प्रक्रिया थालिएको उपप्रधानमन्त्रीसमेत रहेका पोखरेलले जानकारी दिए ।

बाबुराम भट्टराई नेपाल ट्रष्टको संरक्षक र विजयकुमार गच्छदार अध्यक्ष रहेका बेला २०६९ साल कात्तिक २ गते मन्त्रिपरिषद बैठकबाट करिब १७३ रोपनी जग्गा मोही तथा उनीहरुको हकवालाका नाममा नामसारी गरिएको दाबी गरिएको छ ।

बाबुराम सरकारले मोही खडा गरेर दिएको नेपाल ट्रष्टको जग्गा कानून बमोजिम ट्रष्टकै नाममा एकलौटी हुने दाबी गरिएको छ । ट्रष्टले यसबारेमा अध्ययन गर्न गठित समितिले २०७६ जेठ ७ गते पेश गरेको प्रतिवेदनमा भूमी सम्बन्धी ऐन, बमोजिम नेपाल सरकारको स्वामित्वमा भएको जग्गा कमाउने व्यक्तिलाई मोहीको हक प्राप्त नहुने उल्लेख छ ।

भट्टराई सरकारले नेपाल ट्रष्टको नाममा कायम भइसकेका जग्गाहरु व्यवस्थापन गर्ने सम्बन्धमा नेपाल ट्रष्ट ऐन, २०६४ को दफा १३ र दफा २४ ले व्यवस्था गरे बमोजिमको प्रकृया पूरा गर्नुपर्नेमा सो प्रकृया पूरा गरेको नदेखिएको समेत समितिले राय दिएको छ ।

त्यसैले मोही कायम भएका काठमाण्डौं जिल्ला साविक मातातिर्थ, थानकोट, हादेवस्थानलगायत गाविस स्थित नेपाल ट्रष्टको जग्गा पूर्ववत अवस्थामा नेपाल ट्रष्टको नाममा कायम हुन आवश्यक देखिएको सरकारको ठहर छ ।

यसैबीच बालाजु वडा नम्बर १७, इचुंगमा रहेको नेपाल ट्रष्टको १० रोपनी ६ आना जग्गा पनि २०६९ भदौ १ गते तत्कालिन बाबुराम भट्टराई नेतृत्वको सरकारले निणय गरी मोहीको नाममा नामसारी भएको श्वेतपत्रमा उल्लेख छ ।

प्रचलित कानूनमा रही गोकर्ण रिर्सोटको म्याद थपिएको होः उपप्रधानमन्त्री पोखरेल