Sansar News
जिन्दगीको बगरमा बगिरहेछ
विशाल नदिहरू
एकमा दुःख र अर्कोमा सुख
नदिहरू भेट हुनेगर्छ
समयको दोभानमा
र संगै अङ्गालो मारेर दगुर्छ
तर,
जिन्दगी कति स्वार्थी छ
सुखहरू अङ्गालेर
दुखलाई पन्साउन खोजिरहन्छ पर–पर
सुख र दुःखको समिश्रण नै ‘जिन्दगी’ हो
भनेर सम्झाउँदाको हत्तु – हैरान
अनि त समयले पढाउँछ पाठ
जिन्दगीलाई
ढुक्ढुकीहरू छाम्दै–छाम्दै
कहिले खोल्चा बनेर बग्छ
आँसु र भोक
सपना र अप्राप्ति
कहिले कुलो बनेर बग्छ
प्रेम र धोका
आकांक्षा र रहर
त कहिले झर्ना बनेर बग्छ
रोदन र हाँसो
गरीबि र खुसी
अन्तमा जम्छ समुंद्र
त्यहींबाट निस्किन्छ एउटा ‘हिरा’ जिन्दगी !!
वि.सं.२०७७ फागुन २९ शनिवार ०६:०२ मा प्रकाशित
