हामी सबैकाे संसारन्यूज

जपें शम्भो शम्भो तनमन सँगै एक मनले
जपेकी हो मैले बहुत शिवको नाम तनले ।
बसेका छौ भोले गिरिशिखरमा साथ जननी
तिमी नै हौ प्यारा सकल जनको दिव्य रजनी ।

खरानी सेताम्यै हरपल सफा अंग भरमा
बगेकी छन् गंगा कलकल सफा मूल छ जटा ।
गलामा छन् ज्यूँदा सलबल सदा नाग गहना
लिएका छौ सारा भुवन प्रभुले हात भरमा ।

छ बेरेको छाला अभय पशुको कम्बर भरी
बलेका छन् तिम्रा सकल बदनै झल्मल गरी ।
भयो तिम्रो प्यारो अ्अल विष औ भाङ धतुरो
सखी मातालाई हरपल तिमी छल्न चतुरो ।

हुँदा तिम्रै आज्ञा समय क्रमले चल्दछ सदा
तिमी नै हौ गंगा हरपल यहाँ बग्दछ सफा ।
जपें मैले शम्भो हरहर सदा प्रात पखमा
मलाई देऊ है शरण प्रभुको काख तनमा ।

सदा गर्नूस् मेरो हृदय नभमा वास प्रभुले
हटाऊ यी सारा कलुषपन अज्ञान प्रभुले ।
सदा होस् शम्भोको जय जय सदा होस् भुवनमा
सदा होस् शम्भोको सकल जनको वास मनमा ।

छन्द: शिखरेणी