हामी सबैकाे संसारन्यूज

गरूँ काम आजै भनूँ भोलि छैन
विनाकाम चल्ने गुजारा हुँदैन ।
म आलस्य त्यागी बनूँ कर्मयोगी
खरानी घसेका नयाँ देख्छु जोगी ।।१।

हरे राम जप्छ्न् धरी गेरु वस्त्र
छुरा जेबमा छन् लुकाएर अस्त्र ।
विलासी तिनै छन् तिनै सख्त ढोँगी
खरानी घसेका नयाँ देख्छु जोगी ।।२।

हिँडूँ द्वार डुल्दै म भिक्षा न मागूँ
बनोस् लाभदायी र शिक्षा म मागूँ ।
गरी दुःख बाँचूँ बनूँ भुक्तभोगी
खरानी घसेका नयाँ देख्छु जोगी ।।३।

बनूँ स्वस्थ मान्छे म हेर्दै बलिष्ठ
बनूँ कर्मशील्पी र कर्तव्य निष्ठ ।
हटून् रोगव्याधि बनूँ भो निरोगी
खरानी घसेका नयाँ देख्छु जोगी ।।४।

बनूँ भ्रष्ट लोभी न पापी बनूँ म
ममा छैन चाहा प्रतापी बनूँ म ।
विनालाज बाँच्ने बनूँ भो बिजोगी
खरानी घसेका नयाँ देख्छु जोगी ।।५।

छन्द: भुजङ्ग प्रयात

उत्तम विचार, टोखा, काठमाडौं