हामी सबैकाे संसारन्यूज

कल्पना अधिकारी भट्टराई
टोखा, काठमाडौं

लक्ष्य एकै लिओैँ काव्यको सिर्जना
घोलिऊन् काव्यमा कल्पना भावना ।
काव्यमा फुदछन् मानवी चेतना
काव्यले मेट्दछन् नौमुरी तिर्सना ।१।

काव्यमा मिल्दछन् जिन्दगीका कथा
काव्यले बोल्दछन् जिन्दगीका व्यथा ।
काव्य सन्तोष,आनन्दको मूल हो
पौरखी हातको शिल्पको फूल हो ।२।

नेत्र हो मार्ग हो कर्म हो काव्य यो
धर्म हो मोक्ष हो भाव संवेद्य यो।
ज्ञान विज्ञानको स्रोत हो काव्य यो
शास्त्र हो अस्त्र हो स्तोत्र आराध्य यो ।३।

योग हो ध्यान हो पुष्प हो पात हो
प्रात हो साँझ हो चाँदनी रात हो ।
घाम हो जून हो गीत सङ्गीत हो
जिन्दगीमा सधैँ गाँसिने प्रीत हो ।४।

काव्य शिल्पीहरू गर्दछन् साधना
खेल्दछन् शब्दमा अर्थका साथमा ।
व्यन्जना लक्षणा भर्दछन् भावमा
रोशनी छर्दछन् काव्यले विश्वमा ।५।

छन्द : स्रग्विणी
गण : र र र र
सङ्केत: SlS SlS SlS SlS