हामी सबैकाे संसारन्यूज

दीनानाथ पोख्रेल, सुम्बौक, इलाम

नवमार्ग चुनी युगज्ञान दिने ।
फल स्वच्छ दिई बहभार लिने ।।
नरकर्म कृतालय भव्य दिने ।
रच काव्य सुधा उर शक्ति दिने ।।०१।।

जनजीवन दर्द डुलेर धुने ।
अनि सार रहोस् श्रमशील हुने ।।
मन मन्दिरतुल्य छ प्रस्ट बुझोस् ।
हृदि झङ्कृत चाल विशाल खुलोस् ।।०२।।

गुण सञ्चय गर्न समर्थ बनोस् ।
श्रम आर्जित वस्तु खुलेर गनोस्।।
जनचक्षु खुलून् हित टिप्न बढून् ।
शुभकर्म खुलून् मनप्रेम गढून् ।।०३।।

जन पढ्दछ जो निज शक्ति चिनोस् ।
धन लोभ गरी परको नछिनोस् ।।
उर फुल्न सकोस् मनमोद भरोस् ।
सब विश्व झुकीकन फूल छरोस् ।।०४।।

मन अल्मल दूर गरेर उठूँ ।
कविका युगकाव्य समात्न जुटूँ ।।
भय दूर हुने युगज्ञान दिने ।
रच काव्य उठीकन चेत छुने ।।०५।।

यति पाठक माग छ वक्ष भर ।
कवि काव्य रची मृदु ज्ञान छर ।।
जब पढ्दछ पाठक भाव बुझोस् ।
मन कल्मषता सब दूर गरोस् ।।०६।।

कवि काव्यकला मनका विमला ।
जति पान ग¥यो त्यति चेत भला ।।
मनमाग सही यति पाठकका ।
रच काव्य सुधा पथ हुन् भवका ।।०७।।

छन्द : तोटक
गण : स स स स
सङ्केत : IIS   IIS  IIS  IIS