Sansar News
रविराज खनाल, काठमाडौं
राखौँ म के भरोसा गीता छुवाउनेको
सौकत बढोत्तरी भो रिसवत खुवाउनेको
फैल्यो सधैं कुपोषण बस्ती गरीबकोमा
बेमौसमी छ भाषण रासन कुवाउनेको
पद मानमा हुनेको चर्को छ ठाँटबाँट
शोषण बढेछ झन झन पसिना चुवाउनेको
छानो छ जीर्ण घरको छेक्दैन शीत पानी
मन मान्छ हाइसन्चो रैती रुवाउनेको
कर्जा बटुल्छ सत्ता सावाँ र ब्याज तिर्न
फिर्दैन चेत लाग्यो ऋणमा नुवाउनेको ।
बहर : मुजारे मुसम्मन अखरब
अर्कान : मफ़ऊल फ़ाइलातुन मफ़ऊल फ़ाइलातुन
वजन : २२१ , २१२२/ २२१ – २१२२
वि.सं.२०८१ साउन १९ शनिवार ०५:४२ मा प्रकाशित
