हामी सबैकाे संसारन्यूज

अलख निरन्जन लोहार
टीकापुर कैलाली हाल: भारत

भाषा धर्म परम्परा मनुजका सत्मार्गका साधन,
छोपिन्छन् जग लाजका सहजले संस्कारको जीवन,
पाए रत्न समान भाव मनको होला सुनौलो मन,
जो गर्छन् कुभलो समस्त जगमा भोग्छन् नराम्रा दिन ।१।

भोगी भोग विलासमा मगन भै बिर्सिन्छ आफ्नै गति,
राम्रा मित्र जहानका वचनको मान्दैन बोले जति,
राम्रो भाव कहाँ गयो सुजनमा भाग्यो कहाँ सम्मति,
अर्कामा समभावना कम भयो आयो यहाँ दुर्गति ।२।

पापैपाप छ झेलको शिविर भो मान्छे भयो दानव,
काटामार भयो यहीँ समर भो जाग्ने भयो रौरव,
मान्छेका सत भावको विलय भो बाँच्ने भयो कौरव,
गाह्रो भो अब खोज्न सत्व विजका सत्कर्मका सौरभ ।३।

छन् पापिष्ट धरा विनास रजका हिँड्छन् नमानी भय,
सत्ताको भर चाकडी सफल भो चम्चा बने निर्भय,
सेतो खोल छ भित्र काल तनको दुर्भावको आलय,
यस्ताका भर देश पर्छ कसरी होला सबैको जय ।४।

राखौं सोच विचारमा सजगता बोकौँ सफा भावना,
राम्रा कर्म विशालता हृदयमा राखौं सदा सर्वदा,
चाहे देश रहोस् कुनै मनुज होस होस् न्यायको स्थापना,
आफैमा सत भाव राख्न सकिए सत्कर्म हो साधना ।५।

छन्द : शार्दूलविक्रीडित
गण : म स ज स त त गु
सङ्केत : SSS llS lSl llS SSl SSl S
छन्द : शार्दूलविक्रीडित