हामी सबैकाे संसारन्यूज

मचिन्द्र खत्री, धरान, सुनसरी

दुर्दशा भयो,देश रित्तियो
शक्तिहीनको राज्य देखियो।
दक्ष शक्ति यो छैन देशमा
छन् सबै युवा ती बिदेशमा।।१

वृद्ध गाउँमा काल पर्खिदै
बस्दछन् यता आज झर्किदै।
ग्रस्त छन् यिनै ओखती कहाँ ?
गाउँमा मलामी न छन् यहाँ।।२

लाश हेर्छ यो पुत्रको पथ
घाटमा कहाँ चल्छ यो रथ?
तीनचार हप्ता कुरेपछि
बल्ल पुत्र आयो जुरेपछि।।३

राज्य नीति यस्तैछ देशको
रेमिट्यान्समात्रै विदेशको।
ल्याउने र मस्ती रमाउने
छन् युवा उता ती कमाउने।।४

रोक्नु पर्छ हाम्रा युवा यतै
रोजगार खोलून् जताततै।
खन्न जोत्न लागून् कुना कुना
देशमा झुलून् अन्नका मुना।।५

छन्द : द्रुता वा सुन्दरी
गण : र य ज गु
गण सङ्केत : SlS lSS lSl S
अभ्यास :प्रतिभा निकुञ्ज