हामी सबैकाे संसारन्यूज

डा. घनश्याम परिश्रमी

चमेली, जुही फुल्न छाडे कि क्या हो
फुलेका कुसुम हेर्नू मेरो नसा हो

म सिक्दै छु बोल्ने कला नातिबाट
यहाँ काम के हुन्छ, गर्ने कला हो

दबायो कसैले, दबेको छ कोही
चलेको पुरातन यही सिलसिला हो

तिमी हात मल्ने कलाकार दक्ष
र मालिकले केवल मुसार्ने जुँगा हो

धनीका कथामा झुटोपन मिसिन्छ
गरिबको कथा जिन्दगीको कथा हो

सबै धर्मको सार आखिर हो यत्ती
सेवा धर्म हो, देवताको पूजा हो

अँध्यारो कहाँ जूनकिरीले हटाओस्
सलेदो जलेरै त बल्ने शिखा हो

बहर : मुतकारिब मुसम्मन सालिम

अर्कान : फऊलुन् फऊलुन् फऊलुन् फऊलुन्

वजन : १२२, १२२, १२२, १२२

साभार : निभेको शिखा, गजल सङ्ग्रह