हामी सबैकाे संसारन्यूज

तारा बिष्ट छन्दार्पण
हाल : मलेसिया

देश लुट्ने दुष्ट जनको हुन्छ जहिल्यै दल बनेको ।
राष्ट्रघातीकै सधैँभर देखियो हुल खल बनेको ।

बन्छ कसरी देश नेता दाउमा छन् लुट्नेमात्र
लाग्छ यो नेतृत्व हेर्दा स्वार्थले पागल बनेको ।

देशका द्रोहीहरू छन् व्यस्त कुर्सी खोज्नलाई
चाल हेर्दा लाग्छ हो कि बुद्धिमा खाडल बनेको

पाप मात्रै सोच्न थाले योजना छन् देश लुट्ने
देखिने कहिले पो होला देश नै झलमल बनेको

देशमा गणतन्त्र आयो भिन्न केही देखिएन
लाग्छ रक्सी हो पुरानै नौलो हो बोतल बनेको

बहर : रमल मुसम्मन सालिम
अर्कान : फाइलातुन् फाइलातुन् फाइलातुन् फाइलातुन्
वजन : २१२२ – २१२२ – २१२२ – २१२२
अभ्यास : स्वर्ण पाठशाला