हामी सबैकाे संसारन्यूज

दीनानाथ पोखरेलसुम्बेक, इलाम

अगतिलो गति भोग्न परेपछि ।
वितलले तल ठेल्छ डरेपछि ।।
उदरमा दर राख्न त भुल्छ को ?
विगतकै छ सिको अझ वृद्धको ।।०१।।

विभव यो भवमा अति फैलियो।
विभवले भवको मति मैलियो ।।
पहल होस् हल गर्न विचारको ।
विगतकै छ सिको अझ वृद्धको ।।०२।।

अभय होस् भयको गति बन्द होस् ।
अकृतका कृतको पथ दूर होस् ।।
नियम होस् यमतुल्य प्रभावको ।
विगतकै छ सिको अझ वृद्धको ।।०३।।

रहरले हरकर्म हुँदै गरून् ।
अभरमा भर गर्न सबै खटून् ।।
समय होस् सम साधक बुद्धको ।
विगतकै छ सिको अझ वृद्धको ।।०४।।

अजुट दुष्ट छ यो जुट यत्नले ।
बगरमै गर कर्म प्रयत्नले ।।
अमन यो मन बन्न दिँदैन जो ।
विगतकै छ सिको अझ वृद्धको ।।०५।।

छन्द: द्रुतविलम्बित
गण : न भ भ र
सङ्केत :  III   SII   SII   SIS