Sansar News
बिष्णु उप्रेती, बिर्तामोड, झापा
१.
बाछा धेरै कराए
साँढे छ चुपचाप
सबैले उही चाहे ।
२.
मुसाको बुद्धि आएन
शक्तिको तातो रापले
समस्याले निकास पाएन ।
३.
नसच्चिने फोहोरी खेलमा
न्याय विवश हुन्छ
जहिले अन्यायको झेलमा।
४.
परिवर्तन नहुने कहिल्यै
राजनीतिको काँडे बारीमा
गन्धे फुल्छ जहिल्यै ।
५.
मह अरूले खान्छ
बिचरा मौरी रुँदै
फेरि फूलमा जान्छ ।
६.
कामभन्दा कुरा धेर
बेला बितेपछि पछुताउँदै
गर्छन् मुख हेराहेर ।
७.
जान्नेले गर्न मान्दैन
चलन बिग्रेको देशमा
नजान्ने कम ठान्दैन ।
८.
छेपाराको भोलि आएन
रङ्ग फेर्ने बानीले
शान्ति कसैले पाएन ।
९.
सुर्य जाँदा भागेर
जगत भयो चिसो
हुस्सु, कुहिरो लागेर ।
१०.
चिसो हावा चल्दैछ
देख्छ र कसले ?
वृद्धाको शरीर गल्दैछ ।
वि.सं.२०८२ पुस २६ शनिवार ०६:०३ मा प्रकाशित
