Sansar News
वर्षातका विषयमा मत के भनौँ खै
धर्केर रुन्छ मन यो जल त्यो रुँदा झैँ
कालो बनेर नभ त्यो अब झर्छ झर्छ
वर्षातले हृदयमा अति घात गर्छ ।१।
बिर्सिन्छ भन्छ मनले तर बिर्सिँदैन
कुक्रुक्क एक झुपडी जल छेकिँदैन
साना अबोध बिचरा अति प्रश्न गर्छन्
वर्षातको छ घनघोर व्यथा सहन्छन् ।२।
निस्किन्छ आह ! कसरी जब बढ्छ ठन्डी
बल्दैन अग्नि घरमा न त तात्छ हण्डी
आटो थियो बगलमा अनि मास बोडी
वर्षात पस्छ घरमा सब लान्छ गोडी ।३।
वर्सौँ यही गति भयो जब बढ्छ बाढी
वर्षातले दिनदिनै घर खेत माडी
झुप्रो थियो बगरमा खरले चिनेको
वर्षातले लुटिदिँदा तटमा हिँडेको ।४।
छन्द: वसन्ततिलका
वि.सं.२०७८ साउन २३ शनिवार ०७:१६ मा प्रकाशित
