हामी सबैकाे संसारन्यूज

मचिन्द्र खत्री, धरान, सुनसरी

दौरा र टोपी सुरुवाल पाऊँ
भाका मिलाई अझ कोट लाऊँ ।
मेरो चिनारी अति गर्व गर्छु
टोपी सदा यो शिर माथि धर्छु।।१

बाजे बराजे अति काज गर्थे
खाँडी सिलाई शिर ताज धर्थे।
ढाका बुनेका पिता धर्न थाले
पेशा यसैको पनि गर्न थाले।।२

धागो सुतीको अति सानदार
ऊनी मिसाए जति भो कमाल।
झन् बत्थु जड्दा शिरताज राम्रो
टोपी चिनारी कति उच्च हाम्रो।।३

चर्खा घुमाई मसिनो सुताले
काट्लान् रुवा यो करको बुताले।
आमा र काकी गफगाफ गर्दै
पीडा भएका यस बीच छर्दै।।४

टाँगेर धागो छर लामलाम
यो तान बेर्दै गर जोरजाम।
बुट्टा निकाली घर गन्न थाल
तैयार टोपी सकियो कमाल।।५

पाएर दर्जी शिर नाप गर्छन्
नापेर काट्दै कपडा यी भर्छन्।
भित्री सुतीको सजिलो यी भन्छन्
ज्याला मिलेको दिनरात गन्छन्।।६

छन् आज धेरै यसमा डुबेका
यी तान बुन्ने घरमा पुगेका।
छन् यी दलाली सय बीच किन्ने
मौका मिलेमा सय पन्द्र छिन्ने।।७

छन्द : इन्द्रवज्रा
गण : त त ज गु गु
सङ्केत : SSl  SSl  lSl  S  S