हामी सबैकाे संसारन्यूज

अलख निरन्जन लोहार
टीकापुर कैलाली, हाल – भारत

रोयौँ रक्त बगे सुके रहरका उत्साहका सागर,
सत्ताबाट चियाउने नजरमा लाग्यो रतन्धो तर,
मैला हात जवान मर्छ रणमा गोर्खा हिड्यो लाहुर,
जस्का लागि म ज्यान हाल्छु सहजै खादैँछ मेरो धुर ।१।

पल्केको छ सुटुक्क पस्छ घरमा ढाडे विरालो जसै,
छन् भेदी घर भित्रमै अधमका हो मित्र भन्छन् तसै,
केही छैन पता कहाँ मगन भो कुन् ठाम के गर्दछ,
नेताका दिलबाट स्वप्न मनमा बस्दै सिमा हर्दछ ।२।

झम्टे रोष कडा दियो समयमै त्यो चोट हो जान्दछ,
छोडेमा हर बार लाग्छ गलती क्यै हुन्न भो मान्दछ,
नेपाली अब जाग बोल्न बढ है होस् न्यायको स्थापना,
गोर्खा छाप नयाँ बुझोस् सहजले अंग्रेजÞको सम्झना ।३।

नेपाली हद पार गर्छ जसले पढ्नू कथा वीरका,
सोचून् देश बनाउने लहजमा नेता बनून् धीरका,
काटे हुन्छ दलालका शिर सबै हुन्थ्यो सफा आँगन,
राखेमा सत भावना हृदयमा होस् देश जित्ने मन ।४।

यूवाले पनि काम देश भरमा गर्ने अवस्था बनोस्,
आफ्नो साख बचाउने करमले नेपाल आहा भनोस्,
लाखौं छन् त विदेशको कहरमा देख्दैन सत्ता किन,
रातो बाकस रेमिट्यान्ससितमा मान्दैन पापी घिन ।५।

छन्द : शार्दूलविक्रीडित
गण : स म स ज स त त गु
गण सङ्केत : SSS  IIS  ISI   IIS  SSI  SSI   S