हामी सबैकाे संसारन्यूज

डोकोको स्कुल ब्यागबाट
काँटा-कोदालोको कलम झिक्छन्
चन्द्रेदाईले,
आली-आली उफ्रिन्दै सिक्छन् क,ख,ग,घ
अनि लेख्छन् अ,आ,इ,ई
मकैका दानाहरू छर्दै-भेलापार्दै सिकेका हुन्
जीवनका गणित
खेत र पाखा बारीबाटै सिकेका हुन्
जोड्, गुणा र घटाऊ
हो, त्यसैले उम्रिन्छ बीऊहरूको ‘अक्षर’ !
आलस्यपनको गोरूहरू भक्कुचुर जोत्छन्
परिश्रमको मलहरू खनाउँछन्
अनि फर्काउँछन् कुलोहरू पसिनाको
खेतको पुस्तकबाट
भावना र अक्षरका बीऊहरू काडेर
रोप्छन् अनि उमार्छन्
धान, कोदो र मकैका शब्दलहरहरू
आह…अब भने
लेखिन्छ फसलहरू कविता
अन्नबालीका लह-लह साहित्य
खेत नै पाठशाला हो,
परिश्रम नै अध्यापक हो,
उब्जाऊ नै हौसला हो,
चन्द्रेदाई अनि उनको परिवारलाई….!!,