हामी सबैकाे संसारन्यूज

दिनेश गौतम (हरिजन)
साइप्रस, निकोसिया किराँत राईहरुको महान चाड साकेला नाचलाई साइप्रसमा रहेका राई समुदायले धुमधामका साथ मनाएका छन् ।

आप्रवासमा रहेपनि आफ्नो परम्परा तथा चाडबाडलाई जिवितै राख्न साइप्रसमा बसोबास गरिरहेका सबै राई समुदायले साइप्रसको निकोसियामा महान चाड साकेला नाच कार्यक्रमको आयोजना गरिएको थियो।

साइप्रसमा बसोबास गर्ने सम्पूर्ण नेपाली समूदायलाई कार्यक्रममा उपस्थिती जनाइदिन राई समुदायले अनुरोध सहितको निमन्त्रण गरेको थियो । निम्तोलाई स्विकार्दै मे १४ तारिखमा आयोजना गरेको साकेला नाच कार्यक्रममा अनुमान गरेभन्दा धेरै पाहुनाहरुको उपस्थिती रहेको आयोजकले जनाएको छ ।
राष्ट्र गीतबाट सुरु भएको कार्यक्रममा राई पोसाकमा सजिएका सबै दिदीबहिनीहरुले बिभिन्न साकेला गीतमा आफ्नो नाचकला प्रस्तुत गरेका थिए ।

साइप्रसमा यस प्रकारको कार्यक्रम पहिलो भएको आयोजकले जनाएको छ । आफ्नो परम्परा, संस्कृती, रितीरिवाज तथा भेषभूषाको जगेर्ना देश बाहिरै भएर पनि गर्न सकिने उद्धेश्यका साथ यस्तो कार्यक्रमको आयोजना अव उप्रान्त नियमित गरिने पनि आयोजकले जानकारी गराएको छ ।
कार्यक्रमको संयोजन धुर्व तारा राई, सेरबहादुर राई, रमिला राई, संगम राई, एस्टीना राई, गोमा राई, सरमिला राई, निरु राई र बसुन राईले गरेका थिए ।