हामी सबैकाे संसारन्यूज

भुवन शिवाकोटी चौघरे, काठमाडौँ

मनमा
कुनै न कुनै पीड़ा नहुने
जीवनमा
कुनै न कुनै अभाव नहुने
को छ र संसारमा

तै पनि
कोही मनका विरह हाँसेरै फुकाउँछन्
र मन हल्का बनाउँछन्
कोही
आफ्नै मुटुमा गाँठो पारेर राख्छन्
र बाँचुन्जेल
आफै, भित्र दुखिरहन्छन्

यसर्थ
राग र अनुरागको समय हो
आफ्नै अनुहार आफैसँग लुकाउन
कहिलेकाहीँ
सामुन्नेको ऐना हटाउनु पर्छ
र आफ्नै अनुहारमा कसैको अनुहार हेर्न
ऐना देखाउनु पर्छ

समय नै हो
एकान्त मात्रै होइन
कहिलेकाहीँ
आफ्नै आँसु आफैसँग लुकाउन
अँध्यारो साथी चाहिन्छ ।।

यार !
खुसीको चर्चा पो दुनियाँमा कम सुनिन्छ
विरहको हल्ला त
निमेश भरमै
आँधीको डँडेलो जसरी फैलिसक्छ ।।