हामी सबैकाे संसारन्यूज

भुवन शिवाकोटी चौघरे,काठमाडौँ

तिमीले छोडेको लगन गाँठोमा
खुसी खुसी अरुले नै हात समाएपछि
अब आफै भन न
फलाम जसरी गाँसिएको विश्वास
छुट्टिन्छ कसरी ?

यज्ञशालाको अग्नी साक्षी राखेर
धेरै मान्छेका अगाडि
फेरो लिएको कसम भन्दा पनि विशेष
देह र मनसँगै जोडिएको सम्बन्ध
नाता र दिलको चिनारी
कसरी बदलिन्छ र

यार,
सजिलै त सिसा हो टुक्रने
कमजोर देख्यौ
र छातीमा तिमीले सकेको हथौडा हान्यौ
तर तिम्रा हरेक प्रहारमा यो दिल
फलाम बन्दै गयो
तिमीले ठोकेकै हथौडाको चोट
हात समाउने उसले खप्यो
तिमी जलिरह्यौ

प्रेमको नयाँ अध्यायमा
तिमीले
अपमानित गरेको दिलको नसुक्ने घाउमा
स्पर्शको मलम लगाएर उसले
धन्न
मेरो शिर झुक्न दिएन
म अनुहार देखाएर उभिन सकें
र त
दिल जितेर कसिएको दिलको गठबन्धन फुस्किने
अब कुनै सम्भावना छैन
र यो
माया र मनको गाँठोलाई
धारिलो हतियार काटेर पनि चुँडाउन सक्दैन
खरानी पारेर दिल जलाउन
अब तिमी नै सक्दैनौं

मलाई थाहा छ
तिम्रो अपुरो काहानी पुरा गर्न
बेला बखत तिमीलाई नै चाहिन्छ
सिन्दुर पोखिएको
पोते चुँडिएको
यज्ञशालाको
मेरो पुरानो कथाको पाण्डुलिपी ..